sawal chhoD ki haalat ye kyun banai hai
use na sun jo kahani suni-sunai hai
patanga shama pe marta hai kya burai hai
use kisi ne bhi roka hai jis ki aai hai
hanse hain gul na kali koi muskurai hai
huzur kaise ye kah dun bahaar aai hai
zarur koi alamat qaza ki pai hai
mujhe azizon ne surat teri dikhai hai
na jaane hijr ki raat aur meri siyah-baKHti
kahan kahan ke andhere sameT lai hai
lahad se kab uThen dekho musafiran-e-adam
safar hai dur ka raste mein nind aai hai
asir kya kahen sayyaad ye to samjha de
qafas mein bu-e-chaman puchhne ko aai hai
mujhe na chheD qayamat hai meri aahon mein
KHuda rakhe teri mahfil saji-sajai hai
Ghazal
Sawal chhoD ki haalat ye kyun banai hai
Qamar Jalalvi