sawal-andar-sawal le kar kahan chale ho
ye aasman-e-malal le kar kahan chale ho
junun ke raste mein ye KHudi bhi azab hogi
KHirad ka koh-e-wabaal le kar kahan chale ho
kahan pe khologe dard apna kise kahoge
kahin chhupao, ye haal le kar kahan chale ho
naha rahe ho azab-e-hijran ki barishon mein
zara si gard-e-visal le kar kahan chale ho
sarab pine ki aarzu hai to jawab de do
safar mein KHwab-o-KHayal le kar kahan chale ho
chale ho jab to hamare mausam badal chuke hain
suno ye mere wabaal le kar kahan chale ho
Ghazal
Sawal-andar-sawal le kar kahan chale ho
Sarwat Zehra