Sahra-e-KHayal ka diya hun

sahra-e-KHayal ka diya hun
virana-e-shab mein jal raha hun

saghar ki tarah se chur ho kar
mahfil mein bikhar bikhar gaya hun

apne hi lahu ki raushni mein
nairang-e-jahan ko dekhta hun

wo chand hun gardishon mein aa kar
KHud apni nazar se kaT gaya hun

har ahd hai mere dam se rangin
main naghma-e-saz-e-irtiqa hun

aaina-sifat nazar se teri
aks-e-dar-o-baam ban gaya hun

ehsas ki talKHiyon mein Dhal kar
main dard ka chand ban gaya hun

sun lo mujhe mai-kada-parasto!
bhigi hui raat ki sada hun

gulzar mein rah ke bhi 'raza' main
KHushbu ke liye taras gaya hun