sahar ka husn gulon ka shabab deta hun
nai ghazal ko nai aab-o-tab deta hun
mere liye hain andheron ki phansiyan lekin
teri sahar ke liye aaftab deta hun
wafa ki pyar ki gham ki kahaniyan likh kar
sahar ke hath mein dil ki kitab deta hun
guzar raha hai jo zehn-e-hayat se 'jami'
shab-e-firaq ko wo mahtab deta hun
Ghazal
Sahar ka husn gulon ka shabab deta hun
Khurshid Ahmad Jami