sahal yun rah-e-zindagi ki hai
har qadam hum ne aashiqi ki hai
hum ne dil mein saja liye gulshan
jab bahaaron ne be-ruKHi ki hai
zahr se dho liye hain honT apne
lutf-e-saqi ne jab kami ki hai
tere kuche mein baadshahi ki
jab se nikle gadagari ki hai
bas wahi surKH-ru hua jis ne
bahr-e-KHun mein shanawari ki hai
jo guzarte the 'dagh' par sadme
ab wahi kaifiyat sabhi ki hai
Ghazal
Sahal yun rah-e-zindagi ki hai
Faiz Ahmad Faiz