safar ki aaKHiri manzil ke rahbar hum hain
hamare sath chalo gard-e-rahguzar hum hain
likhi hain chehron pe jo surKHiyan paDho un ko
KHabar ho aam ki duniya se ba-KHabar hum hain
akela-pan hamein mahsus kab hua ab tak
ki dasht dasht hain lekin nagar nagar hum hain
ghanere sae na DhunDo yahin pe dam lo zara
ki jis ki chhanw mein ThanDak hai wo shajar hum hain
samundaron se kaho wo simaT ke aa jaen
ki is jahan mein akele hi kuza-gar hum hain
wo KHub shaKHs hai dekha hai mil ke hum ne use
magar hai ye bhi haqiqat ki KHub-tar hum hain
Ghazal
Safar ki aaKHiri manzil ke rahbar hum hain
Shabnam Shakeel