sadiyon ke rang-o-bu ko na DhunDo guphaon mein
aao kisi se puchho pata un ka ganw mein
ghabra ke bulbule ne samundar ki zat se
phaila diya wajud ko sari dishaon mein
aawaz KHud ko do to mile kuchh jawab bhi
aaKHir pukarte ho kise tum KHalaon mein
DhunDo to dewtaon ke aadarsh hain bahut
par aadmi ka rang kahan dewtaon mein
jogi ko aaj rup ka wardan mil gaya
Thahra jo do ghaDi tere pipal ki chhanw mein
tha naz mujh ko jis ki shanasai par wahi
phaila raha hai zahr mere aashnaon mein
aaseb hasraton ka unhen khae hai 'salim'
kaTti thi jin ki raat kabhi apsaraon mein
Ghazal
Sadiyon ke rang-o-bu ko na DhunDo guphaon mein
Saleem Shahzad