Sadaen dete hue aur KHak uDate hue

sadaen dete hue aur KHak uDate hue
main apne-ap se guzra hun tujh tak aate hue

phir is ke baad zamane ne mujh ko raund diya
main gir paDa tha kisi aur ko uThate hue

kahani KHatm hui aur aisi KHatm hui
ki log rone lage taliyan bajate hue

phir is ke baad ata ho gai mujhe tasir
main ro paDa tha kasi ko ghazal sunate hue

KHaridna hai to dil ko KHarid le fauran
khilaune TuT bhi jate hain aazmate hue

tumhaara gham bhi kasi tifl-e-shir-KHwar sa hai
ki ungh jata hun main KHud use sulate hue

agar mile bhi to milta hai rah mein 'faris'
kahin se aate hue ya kahin ko jate hue