sada ye kis ki hai jo dur se bulae mujhe
qarib jaun to kuchh bhi nazar na aae mujhe
main bujhte bujhte dhuen ki lakir chhoDunga
ye baad-e-tund zara soch kar bujhae mujhe
ghurub ke nahin aasar ye to phir kya hain
ki jism se baDe lagte hain ab to sae mujhe
jala ho dhup mein aur KHal-o-KHad na bigDe hon
bhare jahan mein wo ek shaKHs to dikhae mujhe
kisi ke lams se kundan main ho to sakta hun
magar ye shart koi hath to lagae mujhe
Ghazal
Sada ye kis ki hai jo dur se bulae mujhe
Murtaza Birlas