Sad jalwa ru-ba-ru hai jo mizhgan uThaiye

sad jalwa ru-ba-ru hai jo mizhgan uThaiye
taqat kahan ki did ka ehsan uThaiye

hai sang par baraat-e-maash-e-junun-e-ishq
yani hunuz minnat-e-tiflan uThaiye

diwar bar-e-minnat-e-mazdur se hai KHam
ai KHanuman-KHarab na ehsan uThaiye

ya mere zaKHm-e-rashk ko ruswa na kijiye
ya parda-e-tabassum-e-pinhan uThaiye

hasti fareb-nama-e-mauj-e-sarab hai
yak umr naz-e-shoKHi-e-unwan uThaiye