Sad-barg gah dikhai hai gah arghawan basant

sad-barg gah dikhai hai gah arghawan basant
lai hai ek taza shagufa yahan basant

bhar bhar ke gulistan mein mai-e-aish-o-jashn se
deti hai har ghaDi mujhe ritl-e-garan basant

tu uTh chala to zard hue sab ke rang-e-ru
kal aa gai bahaar mein ye na-gahan basant

aate nazar hain dasht-o-jabal zard har taraf
hai ab ke sal aisi hai ai dostan basant

shadabi-e-nasim se bahr-e-surur ko
karti hai josh mar ke ab be-karan basant

gar fil-masal malaika hon ahl-e-zohd sab
le aawe bahr-e-sair unhen mu-kashan basant

patte nahin chaman mein khaDakte tere baghair
karti hai is libas mein har-dam fughan basant

gar shaKH-e-zafaran use kahiye to hai rawa
hai farah-baKHsh waqai is had kohan basant

gurwa bana ke rish-e-moKHazzab se mohtasib
jata hai us maqam mein jawe jahan basant

'insha' se shaiKH puchhta hai kya salah hai
targhib-e-baada di hai mujhe ai jawan basant