sab se tu bad-guman hai pyare
kis musibat mein jaan hai pyare
chand-suraj mein teri baat kahan
un ki unchi dukan hai pyare
hai alag baat baat ka andaz
apni apni zaban hai pyare
sau sunun aur ek bhi na kahun
munh hai munh mein zaban hai pyare
ab KHuda le use ki tu hi le
bas meri ek jaan hai pyare
dil hai kya mal jaan hai kya chiz
tu hi dil tu hi jaan hai pyare
na bacha ek aan bhi aashiq
hae kya tujh mein aan hai pyare
ab mujhe ehtiyaj kis ki hai
tu hi duniya jahan hai pyare
bul-hawas aur ishq ka dawa
tera munh darmiyan hai pyare
kyun na ruKHsat hun mujh se mere hosh
aaj to mehman hai pyare
kya kisi ki sunun shab-e-wada
teri aahaT pe kan hai pyare
dil ke jate hi kash maut aati
mujh ko tujh par guman hai pyare
haal mera zara to sun kar dekh
pyar ki dastan hai pyare
aaina dekh kar na dekh mujhe
kaun tujh sa jawan hai pyare
kasr-e-nafsi nahin tujhe zeba
ye to meri zaban hai pyare
teri dahliz har nirase ko
aas ki aastan hai pyare
ai safi' ab dakan kahan wo dakan
ye to hindostan hai pyare
Ghazal
Sab se tu bad-guman hai pyare
Safi Aurangabadi