Sab neamaten hain shahr mein insan hi nahin

sab neamaten hain shahr mein insan hi nahin
kuchh yun ki jaise ye koi nuqsan hi nahin

ek aayat-e-wajud hun miTTi ke Dher mein
mere nuzul ki to koi shan hi nahin

kabina-e-wujud ka main bhi hun ek wazir
aisa ki mera koi qalam-dan hi nahin

ye jang ab kahan ho badan mein ki ruh mein
goya ki ishq ka koi maidan hi nahin

dast-e-junun bhi tang hua dasht-e-ishq mein
ab chaak kya karun ki gareban hi nahin

hairan hun apne qatl ka ilzam kis ko dun
tauhid mein to shirk ka imkan hi nahin

'ehsas' ne buton mein KHuda ko kiya sharik
is shirk ke baghair to iman hi nahin