sab ki aawaz mein aawaz mila rakkhi hai
apni pahchan magar sab se juda rakkhi hai
jaane kis rah se aa jae wo aane wala
main ne har samt se diwar gira rakkhi hai
aisa hota hai ki patthar bhi pighal jata hai
tu ne sine mein magar chiz ye kya rakkhi hai
zaKHm-KHurda sahi afsurda sahi apni jabin
jaisi bhi hai teri dahliz pe la rakkhi hai
us ne mujh se bhi teri sari kahani kah di
jis ne tujh ko meri har baat suna rakkhi hai
mere sine mein 'munawar' hai usi shoKH ka gham
jis ke sine mein mere gham ki dawa rakkhi hai
Ghazal
Sab ki aawaz mein aawaz mila rakkhi hai
Munawwar Hashmi