Sari tabiren hain uski sare KHwab uske liye

sari tabiren hain us ki sare KHwab us ke liye
har sawal us ke liye hai har jawab us ke liye

hijr ke lamhe shumaren ya lakiren harf hum
har hisab us ke liye hai har kitab us ke liye

qurb us ka hai hamari wapsi ka muntazir
jhelte hain hum bhi duri ka azab us ke liye

wo hamare waste rahta hai har dam muztarib
hum bhi hain aae hue zer-e-itab us ke liye

us ke har dukh ka mudawa apne bas mein bhi nahin
ashk-e-KHun us ke liye hain dil kabab us ke liye

man ki har KHwahish ko wara us ki chahat par 'shafiq'
khil rahe hain tan pe zaKHmon ke gulab us ke liye