sari duniya hai ek parda-e-raaz
uf re tere hijab ke andaz
maut ko ahl-e-dil samajhte hain
zindagani-e-ishq ka aaghaz
mar ke paya shahid ka rutba
meri is zindagi ki umr daraaz
koi aaya teri jhalak dekhi
koi bola suni teri aawaz
hum se kya puchhte ho hum kya hain
ek bayaban mein gum-shuda aawaz
tere anwar se labaalab hai
dil ka sab se amiq gosha-e-raaz
aa rahi hai sada-e-hatif-e-ghaib
'josh' hamta-e-hafiz-e-shiraaz
Ghazal
Sari duniya hai ek parda-e-raaz
Josh Malihabadi