sari daulat tere qadmon mein paDi lagti hai
tu jahan hota hai qismat bhi gaDi lagti hai
aise roya tha bichhaDte hue wo shaKHs kabhi
jaise sawan ke mahine mein jhaDi lagti hai
hum bhi apne ko badal Dalenge rafta rafta
abhi duniya hamein jannat se baDi lagti hai
KHushnuma lagte hain dil par tere zaKHmon ke nishan
beach diwar mein jis tarah ghaDi lagti hai
tu mere sath agar hai to andhera kaisa
raat KHud chand sitaron se jaDi lagti hai
main rahun ya na rahun nam rahega mera
zindagi umr mein kuchh mujh se baDi lagti hai
Ghazal
Sari daulat tere qadmon mein paDi lagti hai
Munawwar Rana