sare jag se ruTh jaana chahti hun
han magar tum ko manana chahti hun
ek KHushi gar tu jo mujh ko de sake to
sare gham ko bhul jaana chahti hun
han watan ko chhoDa barso ho chuke hain
ab main lekin lauT aana chahti hun
ibtida tu hi hai meri intiha bhi
main faqat itna batana chahti hun
inT patthar se makan bante hai sab ke
main bharose ka banana chahti hun
bas tera hi pyar mangun zindagi mein
main kahan koi KHazana chahti hun
main ne kab chaha ki mar jaana mujhe hai
ek jine ka bahana chahti hun
Ghazal
Sare jag se ruTh jaana chahti hun
Megi Asnani