saqiya ye jo tujh ko ghere hain
in mein kuchh rind kuchh luTere hain
apni tahzib kha rahi hai hamein
sanp ke munh mein KHud sapere hain
jis ne baKHshe hain phul gulshan ko
us ne kuchh KHar bhi bikhere hain
kal jo tufan tha samundar mein
us ke ab sahilon pe Dere hain
tere bare mein kuchh nahin malum
hum agar hain to sirf tere hain
hosh-o-ghaflat mein pas hi maujud
mujh ko wo har taraf se ghere hain
tum se to kya nazar milaenge
KHud se bhi hum nigah phere hain
dar-haqiqat wahi adu hain 'falak'
jin ko kahta hai tu ki mere hain
Ghazal
Saqiya ye jo tujhko ghere hain
Heera Lal Falak Dehlvi