saqi mujhe KHumar satae hai la sharab
marta hun tishnagi se ai zalim pila sharab
muddat se aarzu hai KHuda wo ghaDi kare
hum tum piyen jo mil ke kahin ek ja sharab
mashrab mein to durust KHarabaatiyon ke hai
mazhab mein zahidon ke nahin gar rawa sharab
saqi ke tain bulao uTha do tabib ko
maston ke hai maraz ki jahan mein dawa sharab
be-ru-e-yar o mutrib o abru bahaar o bagh
'hatim' ke tain kabhi na pilae KHuda sharab
Ghazal
Saqi mujhe KHumar satae hai la sharab
Shaikh Zahuruddin Hatim