Saqi ho aur chaman ho mina ho aur hum hon

saqi ho aur chaman ho mina ho aur hum hon
baran ho aur hawa ho sabza ho aur hum hon

zahid ho aur taqwa aabid ho aur musalla
mala ho aur barahman sahba ho aur hum hon

majnun hain hum hamein to is shahr se hai wahshat
shahri hon aur basti sahra ho aur hum hon

ya-rab koi muKHalif howe na gird mere
KHalwat ho aur shab ho pyara ho aur hum hon

diwangi ka hum ko kya haz ho har taraf gar
laDke hon aur phathre balwa ho aur hum hon

auron ko aish-o-ishrat ai charKH-e-be-murawwat
ghussa ho aur gham ho rona ho aur hum hon

iman o din se 'taban' kuchh kaam nahin hai hum ko
saqi ho aur mai ho duniya ho aur hum hon