ruKHsar ke partaw se bijli ki nai dhaj hai
kyun aankh jhapakti hai kya samne suraj hai
duniya ki zaminon se ai charKH tu kya waqif
ek ek yahan pinhan kawus hai iraj hai
darwaze pe us but ke sau bar hamein jaana
apna to yahi kaba apna to yahi haj hai
ai abru-e-jaanan tu itna to bata hum ko
kis ruKH se karen sajda qible mein zara kaj hai
insaf karo logo insaf karo pyaro
'shair' ki zamane mein duniya se nai dhaj hai
Ghazal
RuKHsar ke partaw se bijli ki nai dhaj hai
Agha Shayar Qazalbash