ruKH par hai malal aaj kaisa
dilbar hai malal aaj kaisa
us KHal se kya mili hai zillat
aKHtar hai malal aaj kaisa
be-yar nahin hua tera daur
saghar hai malal aaj kaisa
kya aai hai yaad tegh-e-qatil
ai sar hai malal aaj kaisa
hai rahat-e-wasl ke jo aamad
muztar hai malal aaj kaisa
indar meri aah sun ke bole
bahar hai malal aaj kaisa
kya aai hai kuchh KHabar 'saKHi' ki
ghar ghar hai malal aaj kaisa
Ghazal
RuKH par hai malal aaj kaisa
Sakhi Lakhnvi