Roz ek shaKHs chala jata hai KHwahish karta

roz ek shaKHs chala jata hai KHwahish karta
abhi aa jaega baadal koi barish karta

ghar se nikla to jahan-zad KHuda itne the
main ana-zad bhi kis kis ki parastish karta

hum to har lafz mein jaanan teri taswir hue
is tarah kaun sa aaina sataish karta

kisi wahshat-zada aaseb ki manind hun main
ek makan mein kai namon se rihaish karta

ek na ek din to ye diwar-e-qafas girni thi
main na karta to koi aur ye shorish karta

ab jo taswir bana li to ye dhun aur lagi!
kabhi dekhun lab-e-taswir ko jumbish karta

sab andhere mein hain ek apne makan ki KHatir
kya hawaon se charaghon ki sifarish karta

aur kya mujh se teri kuza-gari chahti hai
main yahan tak to chala aaya hun gardish karta

in zaminon hi pe kya KHosha-e-gandum ke liye
aasmanon se chala aaya hun sazish karta