ret qabiz thi bahut KHamosh lagti thi nadi
par karte waqt ye jaana ki gahri thi nadi
jis jagah ab hai ghani aabaadiyon ka silsila
kal usi qasbe ke bichon-bich bahti thi nadi
ek haibatnak manzar dil ko dahlata hua
rasta apna achanak phir se badli thi nadi
us ke andar ki KHamoshi mein ghazab ka raaz tha
apne ek maKHsus lai mein gungunati thi nadi
mil ke lahron se bhi sangam ko tarasti hi rahi
is safar mein aisa lagta hai akeli thi nadi
dekh qadmon ki thakan wo rokti apna bahao
aur mere ek ishaare par hi chalti thi nadi
ye bharam tha so rahi hai wo bhanwar-aghosh mein
Dubne ki aa gai naubat ki jagi thi nadi
ab baDi ho kar samundar ki tarah lagne lagi
chand barson pahle dekha tha to chhoTi thi nadi
pul shikasta tha magar sayyah to be-KHauf the
garmiyon ke din the chaaron samt sukhi thi nadi
Ghazal
Ret qabiz thi bahut KHamosh lagti thi nadi
Rashid Anwar Rashid