rasm-e-mehr-o-wafa ki baat karen
phir kisi dilruba ki baat karen
saKHt begana-e-hayat hai dil
aao us aashna ki baat karen
zulf o ruKHsar ke tasawwur mein
husn o naz-o-ada ki baat karen
gesuon ke fasane dohraen
apne baKHt-e-rasa ki baat karen
muddaa-e-wafa kise malum
dil-e-be-muddaa ki baat karen
kashti-e-dil ka naKHuda dil hai
kyun kisi naKHuda ki baat karen
bhul jaen jahan ke jaur-o-sitam
apni mehr-o-wafa ki baat karen
hum se aazurda hai tabassum-e-dost
isi husn-e-ada ki baat karen
Ghazal
Rasm-e-mehr-o-wafa ki baat karen
Sufi Tabassum