rahna har dam bujha bujha sa kuchh
ho gaya dil ka mashghala sa kuchh
teri zulfon ka meri wahshat ka
milta-julta hai silsila sa kuchh
hum se milne ko ek zamana mila
tera milna tha saneha sa kuchh
aisa ujDa sanam-kada dil ka
ho gaya KHana-e-KHuda sa kuchh
dil ke sahra mein aa nikalta hai
ab bhi koi gurez-pa sa kuchh
lutf-e-diwangi nahin aaya
bazm mein log the shanasa kuchh
Ghazal
Rahna har dam bujha bujha sa kuchh
Rasa Chughtai