Raste yaad nahin rah-numa yaad nahin

raste yaad nahin rah-numa yaad nahin
ab mujhe kuchh teri galiyon ke siwa yaad nahin

phir KHayalon mein wo bite hue sawan aae
lekin ab tujh ko papihe ki sada yaad nahin

ek wada tha jo shishe ki tarah TuT gaya
hadisa kab ye hua kaise hua yaad nahin

hum diya karte the aghyar ko tana jin ka
ab to hum ko bhi wo aadab-e-wafa yaad nahin

waza-dari se hai majbur mera pyar 'qatil'
sab purane hain koi dagh naya yaad nahin