raste jis taraf bulate hain
hum usi samt chalte jate hain
roz jate hain apne KHwabon tak
roz chup-chap lauT aate hain
uDte phirte hain jo KHas o KHashak
ye koi dastan sunate hain
ye mohabbat bhi ek neki hai
is ko dariya mein Dal aate hain
yaad ke is khanDar mein aksar hum
apne dil ka suragh pate hain
sham se jal rahe hain be-masraf
in charaghon ko ab bujhate hain
Ghazal
Raste jis taraf bulate hain
Inam Nadeem