Rahat ke waste na rifaqat ke waste

rahat ke waste na rifaqat ke waste
ab koi mujh ko chahe to chahat ke waste

ye iKHtilaf-e-fikr bahut kaam aaega
is ko bacha ke rakh kisi saat ke waste

donon ko is jahan mein sach ki talash thi
itna bahut tha hum mein rifaqat ke waste

main KHwahish-e-qayam se aage nikal gaya
ab mujh ko mat pukar iqamat ke waste

manzil meri safar hai mera zad-e-rah bhi
main chal raha hun aaj masafat ke waste

wo sanp tha aur us ko sapere se pyar tha
itna bahut tha us ki halakat ke waste