rah mein ghar ke ishaare bhi nahin niklenge
chand Duba to sitare bhi nahin niklenge
Dubne ke liye sahil pe khaDa hun main bhi
bandishen toD ke dhaare bhi nahin niklenge
Thahar ai sail-e-rawan warna ye basti hi nahin
tere gharqab kinare bhi nahin niklenge
meri basti baDi muflis hai magar ai hatim
log yun hath pasare bhi nahin niklenge
tum ajab log ho aangan ke liye rote ho
ab makanon mein usare bhi nahin niklenge
raat bhar jag ke hum ne jo kamai ki hai
us se to din ke KHasare bhi nahin niklenge
tum bhi 'ghaalib' ki tarah lakh jatan kar lo 'shakil'
sare arman tumhaare bhi nahin niklenge
Ghazal
Rah mein ghar ke ishaare bhi nahin niklenge
Shakeel Azmi