qismat se laDti hain nigahen
tere hote kis ko chahen
ulTi dekhen ishq ki rahen
hansna paDe jab rona chahen
ishrat-e-mazi ko rota hun
gham ke gale mein Dal ke bahen
nazuk nazuk jazbe dil ke
halki halki ThanDi aahen
shisha-e-dil ke har TukDe mein
ek ek surat kis ko chahen
mere muqaddar ke sar-name
jalte aansu ThanDi aahen
dukhte hue dil ki rag rag mein
tum chuTki lo hum na karahen
hae tere paband-e-mohabbat
qaidi aansu mujrim aahen
ek ek sans jawab-talab hai
kaise nale kaisi aahen
kya na guzarti hogi dil par
ro na saken jab rona chahen
surKH aankhen hain bhare hain aansu
kis se 'siraj' laDi hain nigahen
Ghazal
Qismat se laDti hain nigahen
Siraj Lakhnavi