Qaul us darogh-go ka koi bhi sach hua hai

qaul us darogh-go ka koi bhi sach hua hai
waiz jahan-bhar ka jhuTa labariya hai

kabe mein jis hasin ka lagta nahin pata hai
mil jae but-kade mein jo wo sanam KHuda hai

puja na kar buton ko apni hi kar parastish
ai but-parast putla tu bhi to KHak ka hai

rag rag mein ye bandhi hai gard-e-malal-e-KHatir
wo said hun ki jis ka sab gosht kirkira hai

umr-e-rawan hai misl-e-mauj-e-rawan gurezan
bahr-e-jahan mein insan pani ka bulbula hai

karne ko sar phuTawwal jis koh ke darre mein
jab main pukarta hun farhad bolta hai

wo but na ram hoga be-rab kisi ke chahe
ai barahman KHuda ka kya koi dusra hai

dandan ke aashiqon ke aansu hain dur nahin hain
nikli jo sitla hai wo bhi to motiya hai

gum-zar 'shad' gahe imroz ra ba-farda
malum ye kise hai kal kya hai aaj kya hai