pyar jadu hai kisi dil mein utar jaega
husn ek KHwab hai aur KHwab bikhar jaega
apni aankhon ko zara hadd-e-adab mein rakhna
warna dhoke mein koi jaan se guzar jaega
ab kisi aur ka tum zikr na karna mujh se
warna ek KHwab jo aankhon mein hai mar jaega
aaina TuTe hue dil ka dikha dun main agar
bewafa KHud tera chehra bhi utar jaega
dil dukhaya na kisi shaKHs ka dil toDa hai
mere hamrah yahi zad-e-safar jaega
Ghazal
Pyar jadu hai kisi dil mein utar jaega
Fasih Akmal