Puri tarah se ab ke tayyar ho ke nikle

puri tarah se ab ke tayyar ho ke nikle
hum chaaragar se milne bimar ho ke nikle

jadu-bhari jagah hai bazar tum na jaana
ek bar hum gae the bazar ho ke nikle

miTTi ke raston pe utre imaraton se
wapas imaraton ke aasar ho ke nikle

apni haqiqaton ko jangal banaya hum ne
aur phir kahaniyon ke kirdar ho ke nikle

aaKHir ko zindagi ke qadmon mein bichh gae hum
aur us ki Thokaron se hamwar ho ke nikle

mashuq ne kara di kya sulh aashiqon mein
sare raqib aae aur yar ho ke nikle

ye shaKHs farhat-'ehsas' aisi buri bala hai
hum us ke sath rah kar be-kar ho ke nikle