pise dil us ki chitwan par hazaron
mu-e-be-saKHta-pan par hazaron
meri zid se hua hai mehrban dost
mere ehsan hain dushman par hazaron
barae-shukr-e-qatil rongTon se
zabanen hain mere tan par hazaron
na aTkheli se chal hote hain sadme
dil-e-shaiKH-o-barahman par hazaron
hua sar KHam na zer-e-tegh jallad
rahe bojh apni gardan par hazaron
tere kushta hain hum aankhen malenge
hamare sang-e-madfan par hazaron
na mal ai luabat-e-chin itr-e-gulzar
gala kaTenge gulshan par hazaron
nahin ek mard ko duniya se matlab
maren namard is zan par hazaron
ajab kya hai agar parwane be-shama
jalen 'atish' ke madfan par hazaron
Ghazal
Pise dil uski chitwan par hazaron
Haidar Ali Aatish