phul zamin par gira phir mujhe nind aa gai
dur kisi ne kuchh kaha phir mujhe nind aa gai
abr ki oT mein kahin narm si dastaken huin
sath hi koi dar khula phir mujhe nind aa gai
raat bahut hawa chali aur shajar bahut Dare
main bhi zara zara Dara phir mujhe nind aa gai
aur hi ek samt se aur hi ek maqam par
gard ne shahr ko chhua phir mujhe nind aa gai
apne hi ek rup se taza suKHan ke darmiyan
main kisi baat par hansa phir mujhe nind aa gai
tu kahin aas-pas tha wo tera iltibas tha
main use dekhta raha phir mujhe nind aa gai
ek ajab firaq se ek ajab visal tak
apne KHayal mein chala phir mujhe nind aa gai
Ghazal
Phul zamin par gira phir mujhe nind aa gai
Rais Farogh