phul ka khilna bahut dushwar hai
mausam-e-gul aaj-kal bimar hai
be-wasila baat ban sakti nahin
mil gai kashti to dariya par hai
aansuon ka aur matlab kuchh nahin
muKHtasar si surat-e-izhaar hai
dosti ka raaz ifsha kar gai
dushmani bhi ek baDa kirdar hai
hum safine ke liye ek bojh hain
hum agar Dube to beDa par hai
zindagi ki razm-gahon mein 'zuhair'
sarfaroshi aaKHiri tyauhaar hai
Ghazal
Phul ka khilna bahut dushwar hai
Zuhair Kanjahi