phirte rahe azal se abad tak udas hum
aae na inqilab-e-zamana ko ras hum
dekhenge chhu ke surKH badan aaftab ka
tabdil kar chuke hain KHala ka libas hum
ye zindagi to KHun-e-jigar pi gai tamam
kaise bujhaen sukhe samundar ki pyas hum
shahr-e-junun ki dhup jala degi jism-o-jaan
chaliye chalen ghanere chanaron ke pas hum
pur-nur hai hamin se KHaraba hayat ka
raaton ka rang tum ho ujalon ki aas hum
amrit sharab zahr aji kuchh to Daliye
aae hain le ke dur se KHali gilass hum
jab se bichhaD gai teri KHana-ba-dosh yaad
ai 'prem' sune ghar ki tarah hain udas hum
Ghazal
Phirte rahe azal se abad tak udas hum
Prem Warbartani