phir wahi KHana-e-barbaad hamare liye hai
shahr-e-gharnata-o-baghdad hamare liye hai
jhelna hai hamein phir karb faramoshi ka
phir wahi silsila-e-yaad hamare liye hai
nind ke shahr-e-tilismat mubarak hon tumhein
jagte rahne ki uftad hamare liye hai
gham hain aashob-e-KHudi mein hamein warna ek shahr
KHun se tar shor se aabaad hamare liye hai
dhunDiye aks-e-'qamar' raat ke aaine mein
aaj ki shab yahi irshad hamare liye hai
Ghazal
Phir wahi KHana-e-barbaad hamare liye hai
Qamar Siddiqi