Phir unki yaad ke dipak jalae hain maine

phir un ki yaad ke dipak jalae hain main ne
ki KHufta hasrat-o-arman jagae hain main ne

zamana jin ke tasawwur se hi laraz uTThe
qalil umr mein wo gham uThae hain main ne

gham-o-alam ke samundar mein Dub kar aksar
nashat-o-aish ke naghmat gae hain main ne

nahin nahin hai nahin qabil-e-yaqin koi
KHuda ke bande bahut aazmae hain main ne

hua hai aaj ye ek lamha-e-tarab hasil
wagarna aansu hi aansu bahae hain main ne

'jamal' talKH tajrabaat bughz-o-nafrat se
tarane mehr-o-wafa ke sunae hain main ne