phir koi KHwab tere rangon se juda nahin dekha
kya kuchh dekh liya tha hum ne kya nahin dekha
awwal-e-ishq ki saat ja kar phir nahin aai
phir koi mausam pahle mausam sa nahin dekha
sab ne dekha tha tera hum ko ruKHsat karna
hum ne jo manzar dekhne wala tha nahin dekha
be-kal be-kal rahna did ka phal to nahin hai
dekhne wali aankh ne jaane kya nahin dekha
hum jise parda-e-KHwab mein rah kar dekh rahe hain
jagne walo tum ne bhi dekha ya nahin dekha
Ghazal
Phir koi KHwab tere rangon se juda nahin dekha
Mohammad Khalid