phir koi hadisa hua hi nahin
koi un ki tarah mila hi nahin
ho chuki pattharon ki barish tak
zaKHm-e-ehsas jagta hi nahin
sar se pani guzar chuka hai magar
dil kisi taur Dubta hi nahin
tai hue marhale kai lekin
fasla to koi miTa hi nahin
un ko kya kya gile rahe hum se
hum ko jin se koi gila hi nahin
aas ne aa ke dam kahan toDa
ab ke 'ruhi' pata chala hi nahin
Ghazal
Phir koi hadisa hua hi nahin
Roohi Kanjahi