Phir aas-pas se dil ho chala hai mera udas

phir aas-pas se dil ho chala hai mera udas
phir ek jam ki barja hon jis se hosh hawas

hazar rang sahi par nahin zara bu-bas
hawa-e-sahn-e-chaman hum ko aae kaise ras

sitare ab bhi chamakte hain aasman pe magar
nahin hain shomi-e-qismat se hum sitara-shanas

khile hain phul hazaron chaman ke daman par
nawa-garan-e-chaman ko magar nahin ehsas

dil-o-jigar mein murawwat se paD gae nasur
hamein nahin hai magar us ke phal se phir bhi yas

ghire hue hain agar barq-o-baad-o-baran mein
to kya hua ki kinare ki hai abhi tak aas

junun ko apne chhupaen to kis tarah yaro
ki tar tar hai is shaghl-e-pak ka akkas

jo bewafai-e-gul se shikasta-KHatir ho
use batao ki hai ba-wafa-tar us se ghas

main is sharab-e-mohabbat se tang hun 'arshi'
ki jitna pijie baDhti hai aur utni pyas