phaile hue ghubar ka phir moajiza bhi dekh
raste se jo bhaTak gaya wo qafila bhi dekh
main ne to aasman ko Thokar pe rakh liya
zarre mein kaenat ka ye zawiya bhi dekh
kab tak tu sare shahr ko bauna bataega
KHud par bhi kar nigah kabhi aaina bhi dekh
mere labon pe dekh na tu KHamushi ki mohr
tu apni harkaton ka zara silsila bhi dekh
shahr-e-ana mein aaine ke ru-ba-ru hun main
ehsas ki nazar se mera hausla bhi dekh
'alam' nae jahan ki satwat bayan kar
sadiyon se jis pe nur hai wo rasta bhi dekh
Ghazal
Phaile hue ghubar ka phir moajiza bhi dekh
Afroz Alam