PatjhaD ke nazaron ki taraf dekh raha hun

patjhaD ke nazaron ki taraf dekh raha hun
be-kaif bahaaron ki taraf dekh raha hun

taqdir ke maron ki taraf dekh raha hun
main Dubte taron ki taraf dekh raha hun

phir doston yaron ki taraf dekh raha hun
sanpon ki qataron ki taraf dekh raha hun

hain dafn jahan meri tamannaon ke ahram
un ujDe dayaron ki taraf dekh raha hun

tu bhi to hazaron ki taraf dekh KHudara
main bhi to hazaron ki taraf dekh raha hun

to ghuncha hai ghunchon ki taraf dekh raha hai
main KHar hun KHaron ki taraf dekh raha hun

sarshaar kinare bhi hain ab Dubne wale
be-kar kinaron ki taraf dekh raha hun