paron ko khol zamana uDan dekhta hai
zamin pe baiTh ke kya aasman dekhta hai
mila hai husn to is husn ki hifazat kar
sambhal ke chal tujhe sara jahan dekhta hai
kaniz ho koi ya koi shahzadi ho
jo ishq karta hai kab KHandan dekhta hai
ghaTaen uThti hain barsat hone lagti hai
jab aankh bhar ke falak ko kisan dekhta hai
yahi wo shahr jo mere labon se bolta tha
yahi wo shahr jo meri zaban dekhta hai
main jab makan ke bahar qadam nikalta hun
ajab nigah se mujh ko makan dekhta hai
Ghazal
Paron ko khol zamana uDan dekhta hai
Shakeel Azmi