pal-do-pal hai phir ye sona miTTi ka
kar do mera tayyar bichhauna miTTi ka
ek Thokar se donon TuT ke dekhte hain
tu kanch ka main hun khilauna miTTi ka
tere shish-mahal ki chhat bhi shishe ki
mere ghar ka kona kona miTTi ka
kitne mani rakhta hai zara ghaur to kar
kuza-gar ke hath mein hona miTTi ka
aag ka hansna dekh hawa ke lahje mein
pani ki aawaz mein rona miTTi ka
Ghazal
Pal-do-pal hai phir ye sona miTTi ka
Athar Nasik