pahlu mein ek nai si KHalish pa raha hun main
is waqt ghaaliban unhen yaad aa raha hun main
kya chashm-e-iltifat ka matlab samajh gaya
kyun tark-e-arzu ki qasam kha raha hun main
kya kuchh na thi shikayat-e-kotahi-e-nazar
ab wusat-e-nigah se ghabra raha hun main
ai dost arz-e-gham pe na yun muskura ke dekh
apni nazar se aap gira ja raha hun main
tu ye samajh raha hai ki majbur-e-ishq hun
kuchh soch kar fareb-e-wafa kha raha hun main
Ghazal
Pahlu mein ek nai si KHalish pa raha hun main
Habeeb Ashar Dehlavi