Pahle jaisa nahin raha hun

pahle jaisa nahin raha hun
main andar tak TuT gaya hun

jaise kaghaz phaT jata hai
do TukDon mein paDa hua hun

dost mera kyun sath nibhate
jab main un ko chhoD chuka hun

kitna chhoTa sa lagta hun
dur se KHud ko dekh raha hun

shishe ki diwaron wale
ek kamre mein qaid paDa hun

logon ke zahir baatin ko
dekhta hun hansta rahta hun

taswiron ka qaht paDa hai
aur main rang baha baiTha hun

koi mera haal na puchhe
main jaisa bhi hun achchha hun